الفساد
انا ضد الفتنة في لبلاد .. ضد العنف بكل انواعو
النار ما تولد غير الرماد ..والرماد للريح يهز شراعو
لكني ثان ضد الفساد ..ضد من الوطنية قناعو
ضد من يستغبي فالعباد .. وبليزافار داير كراعو
ضد الحقرة والاستعباد .. الي يحط فكرسي قاعو
يمارس بيه الاستبداد .. وكأن البلاد صارت تاعو
ضد الشيات ضد .الرفاد .. الي عالزوالي يرفد ذراعو
ومن بعد يوقف استعداد .. عند سيدو خاتم فصباعو
وتقولو راتا عندنا حساد .. ايادي خارجية فينا يتبعوا
راهم يحرضو في لولاد .. باه يخرجوا للطرق يقطعوا
انا نقوللكم هاذ الحساد .. علاه ماحسدوش الي رجّعوا
بلدانهم كيف الجنة فالارض .. او لشعوبهم بناو او طلعوا
جايين يحسدو حفنة قراد .. فاسدين فوق شجرة طلعو
فسدوها وكلاوها وماعاد .. ماترباو ولا حبو يشبعو
واش يخصنا فهاذ لبلاد .. عندنا شباب فبطالة ضاعوا
عندنا التراب و السماد .. عندنا لبذور بصح مانزرعوا
عندنا التل وعندنا الواد .. عندر صحرا و بحر جتامعوا
عندنا العدة والتعداد .. بصح السياح علينا نقطعوا
عندنا الوسائل والعتاد .. عندنا حتى الي يختارعوا
علاش مكاش اقتصاد .. وباقيين فالبترول نتبعوا
بكل بساطة الفساد .. بسبتو رؤوسنا ما طلعوا
السراقين هم الحساد .. وهوما الايادي الي يخلعو
المعريفة صارت اسناد .. داخل الملف نهار تدفعو
اهم من شهادة الميلاد .. الديبلوم تقدر تقطعو
الرشوة صارت شي عاد .. حتى فالمستشفى تسمعو
صار محتم على لعباد .. فوق وتحت الطابلة يدفعوا
حتى فالأمن رانا بعاد .. صرنا نتقاتلوا او نتقاطعو
العنف عندنا بزاف زاد .. والشرطي حاكم سابعو
حنا ثانيت اولاد البلاد .. ماراناش طالبين نتمتعو
ولا رانا طالبين الزاد .. كي نقولو الحمد لله نشبعو
طالبين يحبس الفساد .. باش الاجيال بعدنا يطلعو
يحبوا لعباد او لبلاد .. ماشي كيفنا رانا نتصارعو
انا قلت كلامي هاذ .. وعارف الثمن راح ندفعو
معليش راني فالاستعداد .. ومزال راح تزيدو تسمعو
اذا كتب الله او راد .. يهديكم سبحانو وتقتانعو
راني نتكلم من غير فساد .. ولا راني من الي يقاطعو
لاني ببساطة نحب لبلاد .. ونحب كل واحد فموضعو
ببساطة مانحبش الفساد .. وماشي انا الي كنت مانعو
الي حرمو رب العباد .. ومنعو القانون والي وضعو
واذا كان محلل للسياد .. راهي ليكم كولوها و اشبعو
فيصل كرشوش قصة وقصيد
0 commentaires
Enregistrer un commentaire